बीड येथे मुख्य शासकीय ध्वजारोहण पालकमंत्री धनंजय मुंडे यांच्या हस्ते संपन्न

महाराष्ट्र दिन व कामगार दिनाच्या दिल्या शुभेच्छा

          बीड/प्रतिनिधी  दि. १ मे २०२०:-महाराष्ट्र दिनानिमित्त बीड येथील जिल्हाधिकारी कार्यालयाच्या प्रांगणात मुख्य शासकीय ध्वजारोहण राज्याचे सामाजिक न्याय व विशेष सहाय्य मंत्री तथा जिल्ह्याचे पालकमंत्री धनंजय मुंडे यांच्या हस्ते झाले. 

          यावेळी ना. मुंडे यांनी महाराष्ट्र दिन व कामगार दिनानिमित्त जिल्हावासीयांना शुभेच्छा दिल्या.  संयुक्त महाराष्ट्र निर्मितीसाठी बलिदान दिलेल्या सर्व हुतात्म्यांना अभिवादन करत कामगार चळवळीतील प्रत्येकाच्या योगदानाचेही यावेळी संस्मरण केले.

          कोरोना विषाणू प्रादुर्भावाच्या पार्श्वभूमीवर आजचा समारंभ अत्यंत साधेपणाने पार पडला. यावेळी  सकाळी ठीक ८.०० वा. ध्वजारोहण करून मानवंदना देण्यात आली. यावेळी आ. संदीप क्षीरसागर, जिल्हाधिकारी श्री. राहुल रेखावार, जि. प. चे मुख्य कार्यकारी अधिकारी श्री. अजित कुंभार, जिल्हा पोलिस अधीक्षक श्री. हर्ष पोद्दार यांसह महत्वाचे अधिकारी व  पोलीस कर्मचारी उपस्थित होते.

पोलीस कर्मचाऱ्यांना पोलीस महासंचालक सन्मानचिन्ह प्रदान

बीड पोलीस दलात सतत १५ वर्षे गुणवत्तापूर्ण सेवा दिल्याबद्दल पोलीस हवालदार मोहन क्षीरसागर, पोलीस हवालदार गणेश दुधाळ आणि पोलीस नाईक नरेंद्र बांगर यांना पालकमंत्री श्री. धनंजय मुंडे यांच्या शुभहस्ते पोलीस महासंचालक सन्मानचिन्ह देऊन गौरविण्यात आले.

          ध्वजारोहण समारंभानंतर पालकमंत्री श्री मुंडे यांच्या हस्ते जिल्हा परिषद आणि  समाज कल्याण विभाग यांच्या वतीने तयार करण्यात आलेल्या दिव्यांग नागरिकांसाठी नोंदणी साठी ऑनलाइन ॲपचे उद्घाटन करण्यात आले.

    याप्रसंगी प्रमुख मान्यवरांसह महसूल, जिल्हा परिषद,  समाज कल्याण, सहकार, पोलिस आदी विभागांचे अधिकारी कर्मचारी उपस्थित होते.